• الأربعاء 16 يونيو 2021
  • 04:44 pm

رئيس التحرير

أشرف مصباح

img
img img-responsive
img

عطشان مشاعر القصيدة الفائزة على مستوى إقليم شرق الدلتا


للشاعر هيثم حمدي سلومة ابن مدينة سيدى سالم بكفرالشيخ 

وببعتلك رسالتي الاولي ياعمري

بدمع العين انا بكتب سطور وحروف ..

بعادك طال ..

وطالت غربتك طالت

وانا وحدي

مابين جدران كساها الخوف ..

وغبت سنين

ولا رسالة بتوصلني

ولا بتقوللي اي ظروف ..

انا وحدي

في ليل بضوافره ينهشني

ومين يتغطي بيه مكشوف ..


انا في أمسّ حاجة اليك ..

انا محتاجة لو لمسة

أنا محتاجة ضم اديك ..

مانش عايزة فلوس منك

ولو هتجيبلي منها الوف ..

أنا عايزاك

وبترجاك

علي حالنا تعال وشوف ..


 ????????


حبيب عمري ..

انا بكتب رسالتي التانيه

بعد مافات علي الاولي شهور وشهور ..

وليه ماوصلش منك رد

يكون ليّه بصيص من نور ..

عيون الناس

بتنهش فيه وتاكلني

وقلبي كأنه باب مكسور ..

ابوس ايدك ..تعال ارحمني م الدنيا

لا انا عايزة حرير منك

ولا عايزة اعيش في قصور ..

انا عايزاك تكون جنبي

وتسند لو يميل قلبي

وليه مش راضي تفهم ليه

كنوز الكون في داهية تغور


 ????????

حبيب عمري

انا بكتب رسالتي السابعة

بعد طول الانتظار ..

وليه منك ما جاني رد

وانا وحدي في وسط النار ..

انا ليلي بيفوت وكأنه دهر طويل

كأن الليل مالهش نهار ..

رفيق عمري

انا بنهار ...

اخوك جاني في عز الليل

بحجة جي يتطمن

عشان يراودني عن نفسي...

وانا عن نفسي كان قلبي بيتقطع

وينزف شوق

انا انثي وليه حقوق

اخوك الجاني جه تاني

جايبلي فلوس ..

وقاللي معاكي مش هيأس

وراح نازل في ايدي بوس

انا وانتي مافيش غيرنا

وليل بيغطي مشاعرنا

وانا بقفل في وشه الباب

وقلبي فيه مرار وعذاب

حسيت ان جسمي بحاله

مخاصمني وسابني وداب

وقلبي جاب قلم وكتاب

بيطالبني حقوق جسمي

كأن فيه مابينا حساب

وانا والليل ونفسي برضه اماره

بقينا اصحاب

عشان خاطري كفايه بعاد

غيابك طال وبعدك زاد

عشان خاطري كفايه بعاد


 ????????

ا

نا بكتب رسالتي الاولي بعد الميه

ولا فيه رد يوم جاني ....

صحابك بدأوا يزوروني

يزور واحد ورا التاني

بشوف عينهم ديابة واقفة بتاكلني وخايفة اضعف

ليلاتي بنام.. وجسمي جعان بجوع جنسي

وشبح الجنس واقف ليا بالمرصاد

كفاية بعاد

انا برجوك بعادك زاد

رفيق عمرك جايبلي هديه

تعرف ايه

قميص للنوم

وقام يرمي علي رجلي فلوس بالكوم

انا عايزاك تكون جنبي وتحميني

انا عايزاك ما تفهمني ...

امتي تحس وتجيني ..

انا مليت

لأمتي مشاعري تفضل فيه مدفونة

ملعونة الفلوس والغربة

ألف وألف ملعونة


 ????????


اخيراً جاني منك رد ..

اخيراً ...بعد ايه بترد

وبتقول ايه ..

حبيبتي وعمري يا قلبي يا اجمل وصف ممكن أقول...

وصلني كل جواباتك

لكن ما قريتش اكترهم

وأعمل ايه انا مشغول ...

خلاص قرّبت ع المليون

فاضلّي كام سنة واوصل

وامتي أنول ...

وحشتيني يا كل الحب والاحلام

خلاص هانت وهرجعلك مع الأيام

انا بجمع فلوس لينا

عشان العوزة والحاجة

عشان ما تمدّي يوم ايدك

ولا تعوزي في يوم حاجة

سلامي لكل من يسأل

سلام وختام ...


 ????????


أنا بكتب جوابي ليك ....

حبيب قلبي ونور عيني

خلاص خليك ....

انا مابقيتش محتاجة

نهائى إليك ...

ماتشغلشي خلاص بالك

انا مابقيتش انام إلا اما أسدّ الجوع

صحابك قاموا بالواجب علي الأكمل

بلاها رجوع

وجمّع في الفلوس جمّع

لوقت العوزة والحاجة

ولا يهمك ....

img
التعليقات

حقوق النشر محفوظة لـ كفر الشيخ اليوم © 2017 - تم التصميم والتطوير بواسطة Starwebers company